Yn Stori, rydym wedi ymrwymo i atal digartrefedd trwy ddarparu amgylcheddau byw diogel, sefydlog sy’n lliniaru’r straen a’r pryder a achosir yn aml gan ansefydlogrwydd tai. Dyna pam rydym yn falch o rannu’r wybodaeth ein bod ni wedi lansio dau brosiect llety â chymorth newydd yn Rhondda Cynon Taf yr hydref hwn.
Ar 7 Medi, fe wnaethom gyflwyno ein prosiect cyntaf, sef cyfleuster llety dros dro ar gyfer merched ag anghenion lluosog sy’n cyd-ddigwydd. Yn dilyn misoedd o waith datblygu ac adnewyddu, mae’r eiddo wedi cael ei drawsnewid yn dŷ amlfeddiannaeth (HMO) tair ystafell wely. Mae’r gofod hwn yn darparu cymorth ystyriol o drawma 24/7, gan gynnig amgylchedd diogel i ferched lle gallant adennill rheolaeth ar eu bywydau.
I ddathlu Diwrnod Iechyd Meddwl y Byd ar 10 Hydref, lansiwyd ein hail brosiect, a gynlluniwyd i gefnogi pobl ifanc sydd mewn perygl o fod yn ddigartref yn ardal RhCT. Mae’r gwasanaeth 24 awr hwn yn cynnwys pedwar fflat hunangynhwysol, gan ddarparu cartref diogel a chefnogol i unigolion ifanc ar eu llwybr i fyw’n annibynnol.
Mae ein dull o gefnogi yn canolbwyntio ar feithrin cyfleoedd a rhannu cyfrifoldebau, gan rymuso unigolion i symud tuag at annibyniaeth. Trwy feithrin perthnasoedd dibynadwy a darparu tai sefydlog, rydym yn helpu i sicrhau bod y bobl rydym yn eu cefnogi yn teimlo’n hyderus, gan wybod bod ganddynt system gymorth ddibynadwy a chyson.
Gyda’r ddau brosiect ar waith erbyn hyn, rydym wrth ein bodd o barhau i fod yn rhan o ymrwymiad yr Awdurdod Lleol i atal digartrefedd yn RhCT. Rydym yn diolch i’n partneriaid cymunedol, ein comisiynwyr a’n cleientiaid am ymuno â ni ar gyfer lansio’r prosiectau ac i’n tîm Stori ymroddedig sydd wedi gweithio’n ddiflino dros y misoedd diwethaf i wireddu’r prosiectau hyn.